Bazar Serthlum

C.Rokhuma 

Ser huan neituten ngun taka chhiarin lo zir ang che u 

Kum tinin, Serthlum seng hun vanglai bazar dinhmun hre turin New Bazar ka fang kher thin a; thla pawh ka la thin. Kumin December ni 15-ah pawh khan Bazarpuiah Serthlum dinhmun hre turin ka va fang vel a; kumin zet chu tah a chhuak a ni e. Nidanga Serthlum rah tha pui pui an chhun vum ther thurna hmunah khan, a kem, a ningnawi ni lek lek awm, arla tui tia lek lek an lo chhung ve thlih thliah a; ka va han lainat tehlul em! In ka thlen chuan a chhan leh a vang ka zawng nghal a. A chhan ni bera ka hriat tak chu; ruahtui tlak danin a zir loh vang niin ka hria.

Kum 14 chhungin kum tin ruahtui tlak dan, a thla tin tam dan te ka lo chhinchhiah tawh a, chuta tang chuan kan buh leh thlai thar dan ka lo chhut thin. Kum 2004, January - March thla thlengin ruah teh tham a tla miah lo va, chu chu kum thar thing chawr tur leh March thlaa Serthlum ang chi thei par chawm puitlinga rah titha tura ruah pawimawh ber sur hun tur a ni a. An dan angin Serthlumte chu phur takin an han par tan ngei mai a, chawmtu an neih tak loh avangin Serthlum par puitling zo lovin a rawp thuai a, a tla bang rah chhunin a tet phah ta nghe nghe a. Kum 2003-a thei phun nun tam takin an thih phah bawk a. 2003 December-ah khan ruah inches 1.25 lo tla hlauh lo phei sela Serthlum kung tâm tak chu a tam zui nghal ang. 2004-ah pawh khan November-ah inches 1 che che chauh a tla a, December-ah a tla miah lo va (Aizawl atanga teh); kum tharah hian ruahtui hmel kan hmuh har phei chuan, huanneitute chu kan chau hle ang tih lo hre lawk rawh u. Hapta khatah vawi khat tal tui in leih thei em? 

Ruahtui tlak danin ser rah dan a hril em em tih kan hriat rualin ruahtui a tlak tlem chuan ser tâm a zual tih kan hre thei ta bawk a; hei hian ser tam chhan ber pakhat chu, a natna ngawr ngawr aiin, ni sa, tui tlakchham leh a hmun zir loh a ni tih a chiang a. Heng thil avang hian, Mizo tan kan sum hmun vêna thlai pawimawh ber, a hmun sawn sawn ngai lo awm chhun chu Serthlum hmun ngei hi a ni tih pawm nghet chiah ila. Serhmun tur chu, ZELEM (Niin a thawia a chhun), CHHUAH CHHAWNG (Tlai lam ni sa pumpelh awl tur), SEA LEVEL 1500 - 2500 ft., a theih hram chuan tui pipe-a thala chawm theih ni sela, a lei leh hmun a dik phawt chuan lung hmun, lungtehret hmun hnualsuat miah loh tur a ni. Serthlum hian a tawka zar hlim tur thing hnah sin a mamawh em em a, chung zinga tha ber chu THINGKHA a ni a, A zungin thlai chaw a lakhawm a, a hnah, a tang, a kung zawng zawng tawih hi leitha a ni a, a kung silna thli ngawt pawh, Mizo pi/pute chuan buhin a ngeih an ti a, ser tan chuan an Thlarau Thianghlim a ni ve a ni. 

Share: