Grenade a puak

(He thu hi Pu C. Zama lehkhabu 'V' Battalion ami lak chhuah a ni a, facebook lamah post a ni tawh a, a ziaktu phalnaa heta post chhawn a ni. A ziaktu phalna lo chuan hmun danga post chhawn emaw, chanchinbu leh lehkhabua chhuah chhawn phal a ni lo va, chhuah chhawng duh chuan comment lamah emaw lo sawi ula, kan lo dilsak ang che u).

GRENADE A PUAK 28-2-1966 zanlai 12:10 

February ni 28, 1966 zan hian Aizawl khawpui-a awm force hrang hrang te beih tumin volunteer te an inpuahchah mup mup a, hlawm khat chu Aizawl chhuah lam Electric Vengah an inhmu khawm a, zan dar 10: 30 velah Pu L.N.Tluanga (L) Ex MLA in chhak hemi lehkhabu ziah laia Electric Veng chung hi Field tura laihzawl mek a ni a, chumi zawlah chuan ‘V’ battalion, Special Force-te chu an awm khawm a, an ralthuam hman tur silai leh grenade chu Pu L.N.Tluanga chokaah an han en fel (checked) a, an enfel lai hian in chhak zawla nghaktute chuan, “An check zo har mang e,” an ti an ti tawh a.

36 Hand Grenade pakhat Capt. Zamana’n a check laiin a lock-na pin a bung palh a, a adjust leh hman tawh si lova, a puak ta a ni. “Pu L.N.Tluanga te chokaah hian mi 7 emaw chauh kan awm a, kawngkhar leh tukverh kan khar vek si a, grenade kengtu Pu Zamana chuan a grenade ken paihna tur a hmu mai lova, a mangang chuan tuikhawihnaah a theh phei a, tuikhawihna ah chuan a puak ta a ni. Tui khawihna hnaih berah Liankhuma a thu a, a ke lehlam a thluan a, lehlam a tawm a. Grenade chuan a ke tawm lamah a per nasa hle a.

"Lt. Rokima nen dawhkan bulah kan thu a, a mut a chhuak hle a, a muthlu bâwk bâwk a, ka kheuh harh thin a. Pu Zamana’n tui khawihnaa Grenade a paih phei a, a puah hmaa kan han thâwm deuh laihah Lt. Rokima chu a ding a, a din lai chuan Grenade chu a puak ta a. Grenade puak chuan a per a, rei dam lovin an thi nghal a. Chokaa awm mi dang Capt. Zamana Sarawn Veng, 2Lt. Malsawma Dawrpui Vengthar, Capt. Liankhuma Chaltlang, Thanmawia Seventdaytlang, 2/Lt. Aihnuna Chaltlâng leh keiin hliam kan tuar a, he mi zan la la la hian Capt. Zamana leh 2/Lt. Aihnuna tih loh hliam dang zawng chu Durtlang damdawi inah min phur chho a, min admit nghal a. 2/Lt. Malsawma Dawrpui Vengthar chu an zai a, hnimhlum an hnimir chu rawn thaw chhuak zo lovin ni 4-3-1966 ah mual a liam ta a ni,” Laltina’n a ti.

"Pu L.N.Tluanga ina grenade tihpuah palh vanga thi leh hliamte chu Pu R.Zamawia’n Capt. Joseph Kapkima ho buaipui turin a ti a. “Capt. Joseph Kapkima hovin thi leh hliamte chu kan buaipui ta a. Lt. Vansanga’n Jeep a khalh a, Lt. Rokima ruang kan phur a, Chaltlângah kan phur chho a, motor kal theih chin atangin Rokima ruang chu kan zawn a, an inah kan thlen a. Thil awmdan tlangpui kan hrilh hnu chuan Electric Vengah kan tlan thla a, Capt. Zamana leh 2/Lt. Aihnuna tih loh hliam dang zawng chu kan phur a, Durtlang damdawi inah kan tlan chho a, kan admit fel hnuah Aizawlah kan tlan kir a. Chanmary kawn A.O.C bul kan thlen chuan khua a var tan tawh a, Luangmual kan R.V II ah kein kan chhuk thla ta a ni,” Sgt. Lalchamliana’n a ti.

(NB. Thlawhtheihnain Zoram a bomb tih bu chhut hnihna phek 8 paragraph khatnaah hliam tuar zingah 2/Lt. Aihnuna Chaltlang ziah tel loh a ni a. Hliam zinga mi Pu Laltina Durtlâng khua rawna ziak ka ni a, a sawi tel loh avangin ka ziak tel lova. ‘V’ Bn. sulhnu tih bu ka ziak lai hian Lt. Aihnuna a tel tih ka hre leh a, Thlawhtheihnain Mizoram a bomb tih bua ka ziak tel lo a ni).

Ni 1 March 1966 niin Police Durtlâng damdawi inah an kal a, grenade per vanga hliam tuarte statement an la a. Police in thu an zawh lai chuan Capt. Zamana leh Lt. Aihnuna pawh admit turin motor-in a phur thleng a, Police an awm avangin motor-ah chuan an biru a, Police ho an chhuah hnuah an in admit ve ta a ni.

Ni 23-3-1966 niin Assam Rifle Capt. Raya ho Durtlâng damdawi inah an kal a, Assam Police Tiwari leh a hote an tel bawk a, damdawi in chhûngah lût lovin Doctor Nghaka pawnah an ko chhuak a, Capt. Raya’n Dr. Nghaka hnenah grenade per vanga tangte man an tum thu a hrilh a. Dr. Nghaka ngaihdan a ni lova, an inhnial ta a.

Capt. Raya : Damdawi ina awm heng mi pathum Thanmawia, Liankhuma leh Laltina te hi man turin ka lokal a, tunah min pe rawh. 

Dr. Nghaka : Heng mi pathum te hi hliam tuar ka enkawl lai an ni a, in kutah ka pe thei lo. 

Capt. Raya : An ni hi Zoram buai chungchangah a meizanghlaptu te an ni a, Assam sawrkar in a ngai serious em em a, kan hotu ten man turin thu min pe a, chu chu ka rawn kal chhan a ni. 

Doctor Nghaka : Ka enkawl lai an ni a, in ngai pawimawh a nih chuan damdawi inah hian rawn veng ula a ni mai a lawm.

Capt. Raya : Ka sawi tawh ang khan hliam i enkawlte hi sawrkarin a ngai serious hle a, heta an awm chuan a hranpaa a vengtu rawn kal reng a buaithlak dawn a, damdawi in kan nei ve thova, kan damdawi ina kan dah chuan a hranpaa ven an ngaidawn lo a ni.

Dr. Nghaka : A remchang lovang

Capt. Raya : Chuti chu kan kalsan anga, hliamte hi an tlanbo chuan nangman mawh i phur ang. Mawhphurhna i la ngam maw? Mawhphurhna i lak ngam chuan kan lehkha rawn kenah hian i hming ziak la, kan kir leh mai ang. 

Hmai sen khawpa an inhnial hnuin Dr. Nghaka chu a tang zo ta lova, hliam an enkawl lai chu Captain Raya’n a man ta a ni.

He tih lai hian Capt. Zamana leh 2/Lt. Aihnuna pawh damdawi inah an awm ve reng a, Police in statement an lak ve loh avangin an awm ve tih an hre lova, Doctor leh Nurse ten an sawi chhuah duh loh avangin an man ve lo a ni. A thiante an man hnu chuan damdawi in chu himin an hre lova, an thiante an chah a, an thian ten dam tha lovin an hruai chhuak a, thingtlang khaw lamah an kalpui a, thingtlang khuaah an enkawl zui ta a ni.

Share: