Dursaleng camp-a an awm lai hian tuk khat chu Lt. Col. Lalliana an camp thlang Tuirial lui hnaih lamah ram chin hriat chian tumin ui hruaiin a kal a. Zing dar 6:00 vel a ni ang, vai sipai nen an intawk ta thut mai a, an inen reng a, zawite tein an hnungtawlh ve ve a, inkap lovin an inthathen a. An inthathen hnu chuan C.O. Lalliana chu camp lam panin a kir nghal a, camp pana a kir lai chuan silai ri a hria a. Camp a thlen chuan a ui hruai chu thi hnuangin a rawn thleng ve a, an han en chiang a, a hnungzangah vunpui chatin an kap a lo ni a.
C.O Lalliana’n “Insaseng nghal tur,” a ti a. An insiam zawh chuan BSM Chalrikhuma’n, "Ka’n tawngtai ang e," a ti a, a inthiam leh si lo nge ni a lei a chhuah ta vak mai a. “A lei chhuah chuan kan nuih a tiza a, tleirawl nuih duh lai a ni bawk a, kan nui ta a. A tawngtaia a chham pawh ka hre fumfe lo,” Sangpuii'n a ti.
A 'amen' veleh Tuirial lui an pan a, kal hmasain tanhmun an rem a, hnung lama mite'n tanhmun rem chu an kal pel a, an kal pelh hnu chuan tanhmun an rem ve leh a, chuti ang zela inban let chuan Tuirial lui an kan a. Tuirial luikam atang chuan Kelzam ramah an kai a, awih pang rem lo zet maiah mut hmun an rem a. Chalrikhuma leh Lalchawiliana’n awih pangah chuan thingtuai ft. 3 dan velah an kheng bur a, an thingtuai khen burah chuan mau tlawn an tawn a, “Mau tlawn hi tlawh ula, in tlawh pial chuan in lum a ni mai,” an ti a.
“Kan mu ta a, mau tlawn chu kan tlawh a, kan mut a chhuah deuh hnu chuan kan ke a tawm a, lum kan hlau a, kan muhil ngam bawk si lo va, muhil tha mang lovin kan tlaivar ta a ni,” Sangpuii'n a ti.
Khawvar hnu chuan Kelzam khua an pan a, khaw dai an thlen chuan khuaah vai sipai an awm leh awm loh enthlithlai tur an intir a. En thlithlaitute an rawn kir chuan khuaa vai sipai awm thu leh kal mai tum anga an lan thu an sawi a. Kawng chhak lam hnim karah an biru a, an biru fel chauh tihin vai sipaite chu Tuirial lui panin an rawn kal ta a, kap duh se chu eng emaw zat chu kaphlum thei tur an ni a, mahse, kap lovin an chhuah a, vai sipai an kal liam hnu chuan khuaah an lut a, kawtchhuahah ralveng an indah nghal a.
(Hei hi C. Zama lehkhabu 'V' Battalion Sulhnu' (pg. 67-68) atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).
No comments:
Post a Comment
Eng nge i ngaihdân?