Major Pangliana ho an chhan

Northern Command Major Pangliana leh a hote 60 (sawmruk) vel chu Tualbung khuaa vai sipai kap turin an awmna hmar lam atangin an thawk chhuak a, Tualbung kah ni tur leh a hun an inhrilh chiang lo nge ni, Tualbung khaw thutchilhtu vai sipai kaptute haw lam nen Buhban khuaah an intawk a. Vai sipai kahnaa an tel ve hman lo chu pawi an ti hle a. Buhban khua atang chuan Lailak khua an pan a, Lailak khuaah an lut a. Kawtchhuahah ralveng an dah a, khuaah chuan an chawl a.

Lailak khuaa an awm lai chuan Tualbung khuaah vai sipai an kal tih an hria a, “An haw lam  Lailak khaw daiah lo lambun ila a tha ang,” an ti a. Lailak khaw daiah lambun tumin an chang a, an chang tlaivar a. Vai sipai an rawn lan mai loh avangin a tukah chuan Lailak khuaah chaw ei turin an kal  a. Lailak V/C-te'n, “Kan sipaite hi an hah em mai a, ruai i siam sak ang u,” an ti a, vawk an talh a. Major Pangliana hoin khua an rawn thlen chuan hlui an siamsak nghal a, hlui chu an kil nghal a. Thenkhat chuan bar 2 bar 3 vel chu an bar hman tawh awm e, kawtchhuaha ralveng an dah ten ral hla deuh atanga vai sipai rawn kal an hmuh thu an rawn sawi a, ruai chu ei hman lovin lambun tuma an bawhna lam an pan a. An tanhmuna an bawhfel hnu chuan vai sipaite chu an rawn thleng ta a.

Kap hmasa ber tura ruat Lianchungnunga chuan a kal hmasa ber chu a han kap thal thuai mai a, an hma zawn theuha  vai sipaite chu an kap a, vai sipaiin an kap let bawk a, silai chu a ri ta chur chur mai a. Hetih lai hian vai sipai lambun huam chhûng a lut ve lote chuan an thian lambun huam chhûnga lutte chu chhan tumin hma an la nghal a. Mizo sipai dang khawtlai pawl awmna hnung lam phulah an phei a, dang khawtlai pawlho chu an hnung lam atangin an kap ta a, Mizo sipaite chu an buai hle a, lambun huam chhûnga lutte kap reng chungin hnung lam atanga rawn beitu te chu an bei let bawk a.

Hetih lai hian Lt.Col. Lalliana hote chu Lailak khaw panin an kal ve mek a, vai sipaiin Mizo sipai dang khawtlai pawla awmte an bei lai chu ralkhat atangin an hmu a, chhan an ngai a ni tih an hria a, “Mizo tlangval te u, zam suh u, ‘V’ battalion kan rawn thleng e,” ti a auvin vai sipaite chu ralkhat atangin an kap a. Vai sipaite chu an tawlhsawn ta a.

Vai sipaite an tawlh sawn hnu chuan Major Pangliana ho chu an insaseng ta a. He inkahnaah hian Chuaukunga, Khawruhlian khua leh Seikhawlet Thahdo, Manipur an thi a, Ramhluna, Khawruhlian khua chu a ban bul vei lamah an kap fuh bawk a.  Major Pangliana hote hi ‘V’ battalion ten rawn tanpui lo sela chuan, an chechhe hlein a rinawm. Lt.Col. Lalliana ho chu Buhban khaw lamah an kir a, Buhban khua atangin Lungpher khua an pan a. Lungpher khua atang chuan Tuirial lui lamah an chhuk a, Tuirial lui kanin Tuirial luikam  Lungdai khaw ramah Camp an sa a, an Camp chu ‘Kawrbel Camp’ tiin an vuah a.

(Hei hi C. Zama lehkhabu 'V' Battalion Sulhnu' atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).

Share: