Demdum Camp

Kum 1967 February ni 17 khan Capt. Joseph Kapkima Adjutant hovin section hnih inthlan tihbuaia vai sipai kah tumin Demdum camp atangin an chhuak a. An tum dan chuan Durtlang Hangi Lunglen Tlang atanga Bawngkawn Brigade hmunpui kah phawt a, chumi hnua an kir lamah a remchan dan ang anga vai sipai kah leh zel an tum a. Demdum camp atang chuan Muthi khuaah an lut a, Muthi khuaa an awm lai hian L/Cpl. K. Laldawla Durtlang khua chu a damlo va, kal ve lovin Muthi khuaah chuan a chawl hahdam a. Joseph Kapkima hote'n Hangi Lunglen Tlang an pan lai chu vai sipai election duty-in ral atangin an hmu a, an kap a, vai sipai chu an kap let ve nghal a, Hangi Lunglen Tlang thleng lovin an kir leh ta a ni.

Joseph Kapkima hote an chhuah rual tho hian Cpl. Biakmawia, Sihphir khua, L/Cpl. Lalchawiliana, Zemabawk leh midang 3 chu election tibuaia Lungdai khaw thutchilhtu vai sipai kap turin Demdum camp atangin an thawk chhuak ve bawk a. “Lungdai khaw chhuah lam chulah Pu Dovate chhungkua an  awm tih kan hre sa a, Pu Dovate awmnaah chuan kan kal a,  ‘Pu Do, engtikah nge khuaah in haw dawn’ ka ti a. ‘Independent hma chuan khuaa haw leh kan tum tawh hleinem’ tiin min chhang a. A tawng duhin sawi tur a hre si a, keiniho ai maha a ruh bakah tawngkam a thiam si a, a kianga awm chu hlimthlak tak a ni. ‘Zanriah chaw in la ei awm si lo va, ei nghal rawh u aw’ a ti a. A tawngkam tha chu kan um a, zanriah kan ei ta a. Zanriah eikham hnuah Lungdai khaw panin kan kal leh ta a. 

Lungdai khaw chhim lam Sakawrhmuituai tlang leh Lungdai khaw inkara Lungdai khaw lan chian theihna tlang rem laiah tanhmun kan rem a, zing khawvar hma deuhin ral atangin vai sipai post chu kan chhuk kah a, LMG magazine hnih kan kap zo va, 303 Rifle-in kan kap bawk a, vai sipaite hian min kap let miah lo va. Minute 10 vel kan kah hnuah kan insaseng a, a hmaa zanriah kan eina Pu Dovate chhûngkaw awmna kan pan a, kan thlen chuan tukthuan kan ei a, kan eikham chuan Lungdai khua kan pan leh ta a.

Hemi tum hi chuan Lungdai khaw dai atanga hnai set sawta kah kan tum a, vai sipaiin min lo hmu hmasa  a, daia tanhmun kan rem lai chu min kap ta thut mai a, min kap fuh teuh hle a. Vai sipaite chu kap let ve hman lovin hmanhmawh phelengin kan insaseng ta a. Pu Dova awmna kan thlen chuan, ‘Vai sipai pakhat tal in kaphlum em’ tiin min lo zawt a. ‘Kaphlum teh suh ang, anmahni’n min kap fuh thelh zawk maw le!’ kan ti a. Pu Dova chu a nui huk a, thingpui min lum a, thingpui kan in zawh chuan Demdum camp-ah an kir leh ta a ni,” L/Cpl. Lalchawiliana’n a ti. 


(Hei hi C. Zama lehkhabu 'V' Battalion Sulhnu' atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).

Share: