Tualbung sipai post lak a ni

TUALBUNG   SIPAI  POST  LAK         9-1-1967

Tualbung khua hi 1967 January thla tira Thingsulthliaha hruaikhawm an ni a, hruaikhawm tura rawn kal vai sipai captainchuan tawng a thlahdah hle a, tawng thlahdah awm reng pawh a nihna lai a awm ve a. Tualbung sipai post hi Mizoram chhûnga vai sipai post-ah chuan a rem ber pawla sawi a ni a. Vai sipai awmna tlâng chu buh chhun vum ang deuha tlâng larh hi a ni a. Tlangchhip sang laiah chuan ralven bûk an sa a, tlângchhip sang lai thlang deuhah chuan tlâng vet kualin bawkvaka kal kualna (crawling trench) hmun hnihah laih a ni a, bunker an siam nual bawk a. Crawling trench thuang hniha laih chu a inkalpawhna tur trench laih a ni bawk a. An riahna atang chuan trench tlâng veta an laih pawh turin  crawling trench an lai bawk a.

An ni chhut dan atang chuan vawilehkhata rawn hup burh tur emaw, rawn luhchhuah tur emawa Mizo sipai an rawn thawh theih an ring lo va, lak (capture) tuma an rawn bei a nih pawhin khawvar thleng chu tan khawh thei turah an inngai a. Khua a var chuan indo thlawhnain a rawn pui thei mai dawna an hriat avangin a tawng pawh an tawng huai a ni ang, an Commander Captain chuan, “MNF te chu an Isua ho pawhin rawn thawk se min hneh lo vang,” a ti hial a ni.

Isua hminga chona thu Lt. Col. Lalliana’n a han hriat chuan, “Isua hminga min chona hi kan chhang let ang,” a ti a. Northern Division-a a remchang apiang leh ‘L’ Bn. an bul hnaia awmte chu Tualbung khuaa vai sipai awmte kahpui turin lehkha a thawn a, Buhban khuaa innghak khawm tur tiin a ziak a. Lt. Col. Lalliana ho chu Phullen khua atangin Buhban khaw panin an chhuak a. Hetih lai hian ‘V’ Bn. din leh chu a thuin rem mah se a pangngai ang chuan function a la ni lo va. Lt.Col. Lalliana ho Phullen khua atanga chhuak chu Zawngin khuaah an riak a. Zawngin khaw rama Northern Command in ‘V’ battlioan thiah a niha an silai tun an lak an dahthat chu an la a,  Buhban khaw panin an kal leh ta a. Buhban khuaah an riak a, Buhban khua atang chuan Lungpher khuaah an phei a, Lungpher khuaah an inhmu khawm ta a.

Ni 9-1-1967 zanriah eikhamah Tualbung chu an pan ta a, an vaiin 102 (za leh pahnih) an ni. Tualbung khuaah hian mihring an tlem hle tawh a, damlo leh tar chak lo tlem leh anmahni enkawltu te bakah ran vulh tam deuhte an ran enkawl turin mi tlem an awm bawk a. Lt. Col. Lalliana ho chuan zanlai dar 12:00  rik hma deuhin Tualbung khaw kawtchhuah an thleng a, rei vak lo an chawl a. An tanhmun remna lai tur an inkawhhmuh a. An tanhmun remna tur theuha an inrem fel hnu chuan an che ta a. Silai chu ‘Van kawpuar’ an sawi ang maiin a ri ta un un mai a, Mizo sipaite hi an huaisen hle a,  darkar 2 chhûngin Camp hi an capture thei a ni. 

Camp-ah hian Sikh Regiment Captain hovin sipai 31 an awm a, Camp hmunah 27 an thi a. tuikhur bulah captain a thi bawk a, pakhat a hliam a, 2-in him pialin Seling sipai camp an tlan thleng a, pakhat zawk hi a hnuah mi anglo (rilru kim lo)-in a awm zui nia hriat a ni.

Mizo sipai lam chu Zatawna a banah a hliam a, Vanramnghaka, Ratu khua leh Biakkima, Electric Veng, Aizawl te an thi a, sillai 27 leh pistol 1 an man a ni.

(Tualbung sipai post lâk (capture) chanchin hi ‘Chengrâng a au ve’ tih buah kimchang taka ziak a ni)

Mizoram buai laia Zoram chhûnga India sipai leh Mizo sipaite inkahnaah chuan he inkahna hi India sipai-te chetchhiatna berah India Army headquarters chuan a pawm a. Tualbung sipai post tha eltiang Mizo sipaiin an la thei mai chu mak an ti hle a. India rama Jail hrang hranga Mizo tangte chu India sipai General, Brigedier, Col, Lt. Col, etc. te'n an tlawh a, “En teh u, heng mi te hi Tualbung sipai post capture-tute an nih hi,” an ti a, an en tlawk tlawk mai a ni. Tualbung vai sipai post lak hi Mizoramah chauh a hmingthang emaw kan ti a, vai ram lamah pawh a hming a thang hle a lo ni.

(Hei hi C. Zama lehkhabu 'V' Battalion Sulhnu' atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).

Share: