Lungdai Zauau rama inkahna

LUNGDAI ZAUAU RAMA INKAH     3-2-1967

Lungdaia Assam Rifle awmte chuan a khat tawkin Lungdai Zauau chul an fang thin a. Chul fanga Assam Rifle vak vel chu kah tumin Major Zoro Liankhuma hovin mi 30 (sawmthum) Kawrbel camp atangin ni 2-2-1967 niin an thawk chhuak a, Kharzawl ram chul thlamah an riak a, a tuka tukthuan tur chaw an chhum sa a, chaw chu an fun a, an mutsan ta a.

A tuk ni 3-2-1967 ni chuan hma takah an tho a, Zauau chul an pan a, an thlen chuan vai sipai lambunna tur hmun remchang an zawng a. An duh anga remchang an hmu lo va, tlâng pang per insasengna remchang vak lo hmunah chuan tanhmun an rem ta a. Chalrikhuma firing order tura ruat a ni a, a piah deuhah B. Lalngila a awm bawk a, an tanhmun tura an awm hnu chuan an chawfun kha an ei a.

Zing dar 9:00 velah chuan Assam Rifle chul fang chu an rawn lang ta a, Lungdai khaw mi chula kal tur leh buh phur tur nen an rawn kal ho a, Assam Rifle chu public karah an kal a. Major Liankhuma ho te hian public mite nen an rawn kal ho ang tih an lo ngaihtuah miah lo va, an channa atang chuan han insawn dawn se Assam Rifle hovin an rawn hmu hman ang tih an hlau si a, “A nih nih  kan ni mai ang chu,” tiin lungsi vak lovin an channa ngaiah chuan an awm ta a.

Assam Rifles pahnih an kal hmasa a, an hnungah nula a kal a, nula hnungah chuan Pu Khumtira bawng khalh a kal a, bawng chu buh phur tur a ni. Nula chuan, “Mizo sipai an inlar ngai si lo va, ti hian hlawh in la leh mai thin a ni si a, in vannei ngawt mai,” tiin a hma a kalte chu a fiam vel a. Chutia an tawng bawrh bawrh lai chuan Chalrikhuma’n, “Dal Bahadur-a te khu an vannei rei lo vang,” tiin a kianga mite hriat tur tawkin a phun sap sap a. Vai sipaiin a channa zawn an rawn theng ta a, a puakrang silai ken chuan a han tlir a, a hmasa pahnih chu an hlawm nghal tawp a. Vai sipai dangte'n an kap let nghal a, Mizo sipaiin an kap bawk a, silai chu a ri ta thuai thuai mai a.

Buh phur tura an kaih bawng chu silai ri hlauin an tlan kual a, bawng neitu Pu Khumtira chuan silaimu leng karah a bawngte chu a um a, bawng uma a tlan lai chuan silaimu a tawng fuh ta hlauh mai a, ka pawh chhawn lohvin mual a liam a. Assam Rifles-te chuan public mite chu phenah an hmang a, chuvang chuan Mizo sipaite'n an kap tha ngam lo va, public mite'n phena hman duh lovin tlanchhiat an tum a, Assam Rifles ho chuan an dawmbet lui a.

“Silai ri karah chuan, ‘Kap tawh teh suh u, ka mawngtam an kap hek tawh a nia’ tia hmeichhe au ri ka hria a, kan inkah rei poh leh mipuiin an tuar nasa mai dawn niin ka hria a, firing order-a awm Chalrikhuma hnenah chuan ‘insaseng mai a finthlak loh maw’ ka ti a. Ani pawh a ngaihdan a lo ni ve a. Inkah reiin awmzia neia kan hriat loh avangin Commander Major Liankhuma hnenah insaseng mai tha a kan hriat thu kan thlen a, Commander ngaihdan pawh a lo ni a, rei kap lovin kan insaseng ta a ni,” B. Lalngila’n a ti.

An tum dan chuan lambun huam chhunga mite chu kahhlum veka, an silai lak hnua  insaseng a ni. Mahse, an tum angin thil a kal ta si lo va, an tanhmun atang chuan chho zawnga insaseng a ngai a, an insaseng lai hi vai sipaiin an kap zui a, an kap fuh teuh thin hle a, mahse, tumah thi leh hliam awm lovin an insaseng thei a.

He inkahnaah hian Pu Khumtira a thi a, Pi Thangpuii leh Zoramsangi te'n hliam an tuar a. Assam Rifles hi engzat nge thi a engzat nge hliam an hre lo va, pahnih chu an kap thlu ngei tih an hria a. 303 Rifle 3 (pathum) an man a ni.

An awmna Kawrbel Camp chu Vai sipaiin beih an tum nia report an dawn avangin chhuahsan thain an hria a, Sihphir leh Lungdai inrina Kawrbel camp atanga Tuirial mawng lam Dursaleng ramah an insawn ta a ni.

(Hei hi C. Zama lehkhabu 'V' Battalion Sulhnu' atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).

Share: