Cpl. Hauthuama, Dawrpui Vengthar, Lalnawta, Dawrpui Vengthar leh Lalrina (L), Chawnpui Veng (hemi lehkhabu ziah laia Zotlâng Aizawl) ‘V’ Bn. thiah avanga Aizawla chhukte chu Pu Vanlalngaia, MIS Director-in Aizawl khawpuia donation khawn tura a tih avangin Aizawlah an awm a.
Hauthuama u Hausiama leh Lalrina u Parliani te chu an naute Aizawla an awm (duty) avangin an rilru a hah thin hle a. Hausiama hian Assam Rifle zingah hmelhriat a nei nual a, Parliani nen Assam Rifle-a an hmelhriat leh nel deuh Subedar an hmu a, “In naute chu a rukin ka hnenah rawn kal sela, a hmingin kan han man der ve ang a, reiloteah kan tifel ang a, sikula-ah zir chhunzawm leh sela a tha ang,” tiin Subedar-in thu a lo rawn a.
An pahnih chuan Hauthuama leh Lalrina chu an hmu a, Assam Rifle Subedar an kawm tuma a lo tih dan chu zep nei lovin an hrilh vek a. “Subedar chu rawn hrilh ula, kan hnenah rawn in-surrender rawh se, kan ngaidam thei reng alawm,” an ti et a, a hrilhtute tan a ngeiawmin a beidawnthlak ngawt ang.
Kum 1967 January-ah Sangluaia (L), Mission Vengin Jail Venga a pawisa khawnnaah Hauthuama a hruai a, an kalna hi Police Thana thlang lawkah a ni a. An lenna naupangte'n Police hnenah an hrilh nge ni, Sangluaia’n an lenna pa a biak mawlh mawlh lai chuan Police an rawn lang ta thut mai a, Hauthuama’n a sten gun kenin a lo kap a, Sangluaia nen chuan an insaseng nghal a. Hauthuama chu a ute in Dinthar mawngah a riak a, a u Hausiama a awmnaa kal turin a chah a.
A tukah chuan Hauthuama awmnaah a u Hausiama a zuk kal a, ani chu a lo inbual a, Hausiama’n, “Khawiah nge i silai i dah?” a ti a. Hauthuama’n, “Kawngkhar sir ban bulah khan,” a ti a. Hausiama’n silai chu a la a, a’n en chiang a, lei a lo kai teuh mai a, “Ti ang te chuan a kah pawh i kap thei em ni?” a ti a, silaia lei kai chu a tifai mawlh mawlh a.
“Nizana ka vai kah kha chu a thi chiang ngawt ang,” Hauthuama’n a ti a. “I kap fuh teuh lo,” Hausiama’n a ti a, “A va mak ve, ka kah thelh ka ring miah lo asin,” a ti a. Hausiama’n, “Mama, in-surrender mai rawh, tuna in awm dan ang ringawt hi chuan eng in ang chuang lo vang,” a ti a. “Ka u, vai sipai in-surrender duh rawn zawng la, i hmuh hlauh chuan ka kaisan phah dawn alawm,” a ti ve thung a.
Ni 9-5-1967 zanah Hauthuama, Lalliana Dawrpui Vengthar leh Taia (Lalthianghlima) (L) Dawrpui Vengthar te chu Pi Tluangi, Vaivakawn inah an leng a, zan dar 7: 30 vel a niang, Pi Tluangi in atang chuan an chhuak a, an pathum chuan Vaivakawn kawn lai kawngpuiah chhuk thlak an tum a, kawngpuiah chuan vai sipai an hmu a, kawng sir hnim karah an thu a. Rei an thut hmain Pu Thanliana mual atanga vai sipai rawn kal an hmu a, Lalliana leh Taia chu chhak lamah an tlan chho a, Hauthuama chu thlang lamah a tlan thla a. Tuna (he mi lehkhabu ziah lai) Presbyterian Biak in awmna zawn a thlen chuan vai sipaiin a tukhum lam a beng hnuai deuhah an kap a, a mit hnuaiah a tlâng a, thlang lamah a lum thla a, hnim karah a tlu a. A ruang chu tuma bawihsawm lohvin a tlaivar a, a thiante 2 chhak lama tlante kha chu an him a. Hauthuama ruang chu a chhûngte'n an la a, Dawrpui Vengthar thlanmualah an thlah liam ta a ni.
(Hei hi C. Zama lehkhabu 'V' Battalion Sulhnu' (pg. 74-76) atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).
No comments:
Post a Comment
Eng nge i ngaihdân?