Buhhum leh buhfai chhum pawlh

Dursaleng Camp atangin an insawn tih hi lo chhiar hmasa phawt la...

Kelzam khuaa an awm lai chuan Mutthi lam atangin thu tlanpuitu (runner) chu Kelzam khuaah an rawn lut a, Muthi khaw ram Tuirial luikama ‘V’ Bn. uniform tur puanthan a thlen thu Lt. Col. Lalliana hnenah an hrilh a. Lt. Col. Lalliana’n Lt. Chuaubuanga a ko va, “Runner-in Tuirial luikama puanthan a thlen thu an rawn sawi a, sipai 30 hruai la, zuk la ula a tha ang. Keiniho chu he laiah awm reng lovin Buhban khaw lamah kan chho ang a, Buhban khaw V/C hnenah kan chanchin in rawn zawt mai dawn nia,” a ti a. Lt. Chuaubuanga chu sipai 30 hruaiin puanthan la turin an chhuak a, an chhuah hnu lawkah Lt. Col. Lalliana ho pawh Buhban lam panin an chhuak ve nghal a.

Mutthi khuaa MNV (Mizo National Volunteer)-te'n puanthan uniform tur chu Tuirial luikam Tuirial lui atanga hla vak lovah an dah a, an veng nghal a. Lt. Chuaubuanga hote'n puanthan dahna an thlen chuan puanthan vengtute'n buhfai kg. 4 chauh an nei tawh a. Lt. Chuaubuanga ho chu 30 lai an ni si a, buhfai kg. 4 chu han chhum vek pawh ni se mi 30 tan chuan eng tham mah a ni dawn lo va, MNV commander chuan a naute hnenah, “Buhfai hi a tlem si a, buhhum nen chhum pawlh mai rawh u,” a ti a. Buhfai kg. 4-ah chuan buhhum kg. 2 aia tam mah an pawlh a, an chhum ta a. 

Eirawngbawl an peih chuan khua a thim tan tawh a, zanriah chu an ei ta a, chaw chu bar khat tur an han sawk a, a hum an then vek chuan a buhtak chu tih tham a awm lo va, êng a awm that loh avangin bar khat then chhung a rei hle a, han bar luih chi a ni ngang si lo va, riltam tak chungin an kham ta a, an chaw chhum chu an ei seng lo hle a. Pte. Kâphrânga (L), Sihphir khua chuan pumin a pai tawih (digest) thei tho ang chu maw tiin bar khat chu a hum thian lovin a han bar lui a, lem a tum a, a hrawkah a tang a, a la chhuak leh mai thei si lo va, a lem thei bawk si lo va, a han inkawm luak a, a hrawka buhhum tang a chhuak thei si lo va, zanlai thlengin a buai phah a, zanlai a pelh hnuah eng emaw ti tiin a hrawka buhhum tang chu a la chhuak thei hram a, “Ti ang hrim hrim te chu, Mutthi khaw MNV commander hi attemp to murder-a charge chi a ni lo maw,” a ti chhuak hial a ni.

Riltam tak chungin zanriah an eikham a, “Ka puar ngei mai,” an han tifiam vel a, an eikham kim hnu chuan puanthan chu an in ah sem a, a zan a zanin an kir leh nghal a. Tuirial lui an kan lai chuan Pte. Khupsei Kuki chu a tlu ta hlauh mai a, a rawksai chu tuiah a pil vek a, a han tho leh chu tui a dir ta tluah tluah mai a. A hnunga kal Vanrova’n, “Kaih thawh ka tum a, ka kaihthawh hmain amahin a tho a, ka nuih a za hle nain ka nui ngam chiah lo va. A puanthan ah zawng zawng a huh vek mai si a, chhawk ka tum deuh a, ka chhawk chuan ka rawksai a huh ve vek dawn tihna a ni a, ka chhawk ta lo va, a rawksai ah a rit thar hle dawn a ni,” a ti a, a hnungah a kal zel a.    

Tuirial luikam hmun rem deuh laiah an tlu zal a, a tukah chuan Tuirial lui an kan a, Mualmam khaw ramah an kai a. Mualmam khua mi thenkhat zaukhat bawha hmun khata khua anga an lo awm tawhna hmun an thleng a, Lamkhuang hmin a lo awm a, lamkhuang chu a kawr chawpin an ei fai vek a. Chuta tang chuan chul ramah an kal a, buh la phurh zawh loh an hmu a, buh chu an deng a, an thap fai a, chaw an chhum a, an ei kham chuan an kal leh ta a. Tipaimuk tlangdung lamlian an kan hma deuhin an chawl a, an hma lam an han thlir a, vai sipai an lo zi nak nak mai a. Fimkhur takin an kal leh ta a, vai sipai awmna lai chu an hel a, ramhnuaiah hlir kalin Buhban khuaah an lut a. Buhban khaw V/C te an hmu a, Buhban V/C te chuan Lt. Col. Lalliana te awmna ramhnuai camp-ah an hruai a, an thlen chuan an puanthan ah chu an pe a.

Buhban khuaa puanthui khawl awm zawng zawng kut khawl pahnihah uniform chu an thui ta a, puanthui khawl a tam loh avangin an vaia inkim tur thui chhûng chu a rei duh hle a. Vai sipai an rawn kal thut pawha an buai loh nan tiin puanthuiin measurement an la a, an zai sa vek a, mahni thawmhnaw theuh tur chu an ak far a. Thawmhnaw thui hmasak chak hle mah se Vanapa tlawmngaihna chhawm nung zel tura, a hmingchhala sak a nih avangin thui hmasak an inchuh miah lo va. Vanneihthlak taka vai sipai an rawn kal mai loh avangin uniform chu an thui zo thei ta a ni.

(Hei hi C. Zama lehkhabu 'V' Battalion Sulhnu' (pg. 69-71) atanga lak chhuah a ni a, a phalnaa heta post a ni. A ziaktu phalna la lo chuan hmun danga post chhawn emaw, lehkhabu leh chanchinbua chhuah chhawn emaw phal a ni lo).

Share: